epub
 
Падключыць
слоўнікі

Янка Сіпакоў

Пейзаж з чалавекам

Гэткае дрэва!

Яно зямны шар захапіла карэннямі

І, нібы мяч у сетцы, здаўна яго трымае...

 

Макавіна якая!

Жылплошчы ў ёй хапае для ўсіх абяздоленых птушак,

І песням іхнім, і песням птушыных унукаў і праўнукаў.

 

Пад страху ягоную

Спяшаюць, ідуць адусюль суніцы, лісіцы, баравічкі,

Людзі, ночы, ваўкі, русалкі і нават сонцы.

 

Пад ім знаходзяць:

Сумныя — песню, галодныя — харч,

скалелыя — зацішак...

 

Шчодрае,

вельмі шчодрае гэта зялёнае дрэва-гасцініца.

 

Хто толькі яго пасадзіў: суніцы, грыбы, ваўкі?

Ці птушкі?..

Ці сонца?..

Ці чалавек?..




Беларуская Палічка: https://knihi.com