Заліты пікі серабром —
даліна Алатау.
За горна-снежную любоў
тут плаціцца не танна.
Такое дзіва, пэўна, раз
ты бачыш у жыцці...
А сонца, быццам снежны барс,
у горы мерыцца зайсці.
Шырокі тварам,
як казах,
на небе месяц гляне,
нібы на здымку, на гарах,
пакіне мяккі глянец.
На горад кіне позірк з гор,
зліе яго з фантанамі,
а імі — ведаю я, госць,—
алмаацінцы апантаны.
На схіле ўрук цвіце наўкруг —
сцякае пенаю ружовай.
І сам «Медэо» —
рух,
рух,
рух—
каньком накрэсліць словы:
што мне тут без цябе —
нібы Цянь-Шань
без Кок-Цюбе1.
1 Кок-Цюбе — адна з прыгожых мясцін ў гарах Алатау каля Алма-Аты.