Да вызвалення Беларусі ад белапалякаў
Адышлі бальшавікі,
А прыйшлі «кенаркі»,—
Затрашчалі тут бакі,
Затрашчалі й каркі.
Вось падкраўся партызан,
Стаў за кустам ціха:
Сцеражыся цяпер, пан,—
Будзе табе ліха.
«Бэндзьце здровы, кумпякі,
Довідзэння, млеко,
Бо, пся крэў, бальшавікі
Бардзо недалеко».
Папужаліся паны,
Заблішчалі пяткі,
Паскідалі жупаны,
Пагублялі «гаткі».
У «ожэлка» вырван хвост,
Крыллі ўсе абвіслі,
І, спусціўшы ў землю нос,
Ён паплёўся к Вісле.
Яшчэ ныюць у паноў
Косці ад пачосткі,
А над намі ззяе зноў
Зорка-пяціхвостка.
1923