Не пытайце — «Хто ты?»
Ці яшчэ — «Адкуль ты?»
Бо ён член сапраўдны
З членаў Інбелкульта.
Ужо колькі год вось
Абавязкі члена
Ён спраўляе шчыра
І нясе сумленна.
Хай на дзень хто ходзіць
Хоць разоў па дзесяць,
Ходзіць ён на працу
Два разы на месяц.
Два разы на месяц
У яго ёсць праца:
Атрымаць, што трэба,
Потым распісацца.
Калі ж вы чакалі
Працы павуковай,
Дык яна для члена
Не абавязкова;
Кіньце клапаціцца
Вы, сябры, аб гэным:
Ён да самай смерці
Застанецца членам.
1926