На ўвагу папам-беларусам
Мітрапаліт Варшаўскі Юры
Рашыў зрабіць славяншчыне хаўтуры:
Загадаў ён Віленскай кансісторыі,
Каб усе папы, каторыя
Могуць ужыць беларускай мовы,
Гаварылі б на ёй прамовы.
Я думаю (хоць можна й памыліцца),
Што скора па-беларуску будуць і маліцца,
Дык, каб бацькам духоўным услужыць,
Я рад малітвы ім пералажыць
На беларускую з славянскай мовы.
Вось тут чатыры ўжо гатовы.
Для папоў Заходняй Беларусі
Наш бацька нябесны, збавіцель ты наш!
Маленні нас, грэшных, бязгрэшны, уваж!
Аб хлебе насушным цябе не прашу:
Дадуць прыхаджане — я й сам насушу,
Прасіць я не буду яец ды кілбас,—
Скаромнае ёсць пакуль што яшчэ ў нас.
А вось аб чым шчыра цябе я малю:
Ты сам, як калісьці, сыдзі на зямлю,
Даведайся раз хоць авечак сваіх,
Бо нас не баяцца ўжо — служак тваіх:
Ва ўсе распаўзацца пачалі бакі,
Бляюць што папала, іх крадуць ваўкі.
Ты ў кучку збяры іх ды ў толк прывядзі
І плотам высозным вакол абвядзі,
Каб воўк бальшавіцкі сюды не залез,
Штодзень не цягаў каб ён нашых авец.
Для папоў Савецкай Беларусі
Ох, цар наш нябесны!
Мне жыць стала цесна:
З авец мне карысці
Няма, як калісьці,
Бо воўны не далі,
Ваўкамі ўсе сталі.
А я — ні славечка,
Маўчу, як авечка,
Баюся і пікнуць
Ды рад бы дзе знікнуць,—
Хоць лезці ўжо трэба
Жывому на неба.
Для папоў Савецкай Беларусі
Прасвятая багародзіца!
Ты не бачыш, што тут робіцца!
Дык сядзі ж там ды не кратайся,
Як даўней, ты, дзева, радуйся,
Дый за нас там, багародзіца,
Бо самім нам не прыходзіцца.
Для ўсіх папоў і попікаў, а асабліва для «жывых».
У гэтай малітве скарочаны штаты з 12 членаў на 7
У бога бацьку верую,
Пакуль асмінай мераю,
А як мераць перастану,
Дык і верыць не стану.
Я верую і ў сына
(Хоць жыта і з мякінай),
Ды хто ж бы не паверыў,
Каб гэтулькі намераў?
Вось будзе саладуха!..
Я верую і ў духа,
З якога дапамогай
Намераў гэтак многа.
Самлела ўжо спіна...
І ў цэркаў ядыну
Павінен я верыць,
Каб болей намераць.
Пра той свет не дбаю,
Бо я не чакаю
Прыходу другога
Ні чорта, ні бога.
Я веру: хоць трэсне,
Ніхто не ўваскрэсне.
Хоць як бы ні верыў,
А жыта намераў
Аж сорак асмін.
Амін!
1923