Носік бурачковы
Пасінелы трошкі,
Портак шарачковых
Выцерты калошкі,
Латаны кажушак
Ці такая ж світка,
Лапці на сем вушак —
Вось які Мікітка.
Як бяжыць у школу,
Без канца вясёлы,
Як бяжыць са школкі,
Весялей ў тры столкі.
Прынясе трасянкі,
Дасць вады Рагулі,
А пасля за санкі
І пайшоў на гулі.
Яго «бот» лыковы
Скуратом падшыты,—
Не дагнаць нікому,
Не злавіць Мікіты.
Калі ж вёска ў змроку
Гляне бляскам вокан,
Для хлапецкай песні
Свет, здаецца, цесны.
Перад вамі, дзеці,
Скрозь яснеюць далі,
Жывяце па свеце
Вы без «анамалій».
З вамі напрадвесні
Я, салідны дзядзя,
Пеў бы, здэцца, песні
Ў піянератрадзе.
1926