Раз фашысцкі чорны зброд
Пёр калонаю на ўсход,
Падабралася скаціна —
Разлюлі-люлі маліна!
Ой, ой, ну і зброд!
Разлюлі-люлі маліна!
Па балотах, па палях
Пралягаў шырокі шлях:
Ехаць вырадкам з Берліна —
Разлюлі-люлі маліна!
Ой, ой, ну і шлях!
Разлюлі-люлі маліна!
Едуць подлыя эс-эс,
Перад імі цёмны лес —
Што за ўдалая мясціна!
Разлюлі-люлі маліна!
Ой, ой, ну і лес —
Разлюлі-люлі маліна!
Што тут доўга варажыць —
Трэба міну залажыць!
Ну і штука, ну і міна!
Разлюлі-люлі маліна!
Ох, брат, ну й зарад!
Разлюлі-люлі маліна!
Ты шумі, зялёны гай,
Партызанам памагай!
Выбух, залпы, страляніна —
Разлюлі-люлі маліна!
Ой, ой, ну і бой!
Разлюлі-люлі маліна.
Хлопцы білі, як маглі,
Немцы трупамі ляглі.
Выйшла фрыцам дамавіна
Разлюлі-люлі маліна!
Ой, ой, ну і бой!
Разлюлі-люлі маліна.
1943