Піва, піва, піва.
Шклянкі. Бутэлькі. Куфлі.
Не дзіва,
Што так распухлі,
Што вядзёрныя ражкі.
Цяжка працуюць, цяжка:
Васьмікуфельны працоўны дзень
Штодзень
І «зверхурочных» тузін
Змясціць у пузе —
Гэта ж вам не жарт —
Такі цяжар.
Сялянскім аддае потам?
Э, што там!
Чаго разважаць!
Развага — вяселлю атрута.
Хай сее той, каму крута,
А ваша справа — жаць,
Ваша ніва —
Піва, піва, піва.
І дрэмле сумленне маўкліва,
Залітае куфлямі піва.
1925