БЕЛАРУСКАЯ ПАЛІЧКА

Канстанцыя Буйла

«Лагодны вечар сыпле ў рэчку краскі...»

Лагодны вечар сыпле ў рэчку краскі,

Абняў зарою быструю ваду,—

Вада зару цалуе на хаду —

І ўдаль бяжыць, ружовая ад ласкі.

Халодны ветрык патыхнуў з гары,

Ты атуліў мне цёплай хусткай плечы...

І я шчасліва... Мой сцямнелы вечар

Любоўю ты і ласкай азарыў.

1968

1968

---

Тэкст падаецца паводле выдання: Буйла К. ...Коціцца рэха: Вершы, паэма, лісты / Уклад. і прадмова Д.Чаркасавай.- Мн.: Маст. літ., 1993. - 287 с. [4] л. іл.
Крыніца: скан