epub
 
Падключыць
слоўнікі

Канстанцыя Буйло

«Ярка над Іслаччу зоры гараць...»

Ярка над Іслаччу зоры гараць,

Водбліскі іх зіхацяць на траве.

Глуха, як бубны, бярвенні бубняць -

Лес сваім ходам да мора плыве.

 

Вогнікі скупа блішчаць на плытах,

Чуецца песня далёка ўначы,

Лёгка лунае ў паветры, як птах,

Быццам ад хлопцаў не можа ўцячы.

 

Хлопцы звязалі бярвенні ў плыты,

Гоняць іх смела удаль-далячынь.

А над ракой навісаюць масты,

А пад мастамі бушуе быстрынь.

 

Трэба мець вока на хібах вады,

Трэба руку капітанскую мець:

Ёсць непраходныя ў хвалях хады,

Можна і ў процьму з плытом паляцець.

 

Толькі плыты праганяў тут не раз

Наш атаман - плытагон малады.

Ды вось ні разу ў вірах не завяз

І не збаяўся таемнай вады.

 

1947

 




Беларуская Палічка: http://knihi.com