epub
 
Падключыць
слоўнікі

Канстанцыя Буйло

«Ваал! Я ўсё ужо спаліла на алтары...»

Ваал! Я ўсё ужо спаліла на алтары...

Глядзі: высокаю узносіцца гарой

Мой попел - і няма ўжо больш ў мяне ахвяры, -

Дык не гудзі ты там пракляццем нада мной,

Бо ўсё, што мела я, спаліла на алтары...

 

Ахвярнік мой агонь меў вельмі загарачы:

Чуць што я клала там - згарала ўміг датла,

А я... я ўсё нясла - я не магла іначай -

Усю душу маю я па куску нясла.

А ён усё спаліў... бо вельмі быў гарачы...

 

Глядзі: у попеле агеньчык ледзь-ледзь тлее...

Во - згас! Не! Зноў бліснуў залочаным рубцом

(То дапаляецца астатняя надзея):

Што зоймецца ізноў гарачым ён агнём

І новая на ім ахвяра ўспламянее...

 

Ваал! Надзея йшчэ тліць на маім алтары,

Пад попелу ужо застыўшаю гурбой,

І хоць сягоння я не маю ўжо ахвяры,

Ты не гудзі сваім пракляццем нада мной,

Бо йшчэ надзея тліць іскрою на алтары.

 

1914

 




Беларуская Палічка: http://knihi.com