Адкрывалі адну з крам...
Узялі па колькі грам...
(Што за свята — ды без грам!..)
Ну, а з грамаў —
кілаграм...
А калі ўжо кілаграм —
Дык і выйшаў тарарам...
Раптам бухнула з вітрыны
З громам новенькае шкло.
Раптам хтось бутэлькай кінуў,—
Бы асколкамі ад міны —
Шась! — кагосьці апякло...
І паехала, пайшло,
Закіпела, загуло...
— Ах ты ж гэтакі ды гэткі!
— Ах, такі ты ды сякі!..
Там шкарпэткі, там сурвэткі,
Там бачкі, там чыгункі,
Там люстэркі, бранзалеткі —
Брынк! — ляцяць ва ўсе бакі.
Білі ўсё і без прынукі,
Што патрапіла пад рукі,
Білі, нішчылі, крышылі —
Ў добрай хлопцы былі сіле,
Смачна елі і пілі,
Ўсе асілкамі ўзраслі!
А праспаліся пад ранак —
От канфуз быў дык канфуз!
Што там болькі, што там раны,
Што там нейкі сіні гуз,—
Краму новую — вось гора,—
Што адкрылі толькі ўчора,—
Зноў надоўга зачыняй...
Ды рамонт распачынай!..
Адкрывалі адну з крам...
Узялі па колькі грам...
Што за свята — ды без грам!..
Ну, а з грамаў — кілаграм...
Хвацкі выйшаў тарарам!..
1959