— Ехаў Бай па сцяне
У зялёным жупане.
Будзеш спаць, сынок, ці не?..
— Не! — адказвае Алесь.—
Бай, хутчэй са сценкі злезь,
Бая слухаць не хачу,
Я за казкай палячу!..
Бай хутчэй са сценкі злез,
Бай пайшоў у цёмны лес,
Бай знайшоў там ціхі ўскрай
І адтуль спявае: бай...
Бай-бай, засынай,
Бая ў снах успамінай...
Як ні тузаўся Алесь
З Баем дужацца, ды ўвесь
Узмакрэў,— нарэшце сціх
Сярод казак, сярод кніг...
Спіць...
1986