Чаму я забываюся,
Як білася ў роснай траве
Скрываўленая перапёлачка,
Калі яе разанулі касою?
Чаму я забываюся,
Як з трэскам гарэлі ля маіх ног
Галовы пшанічных снапоў
Пасля цяжкага ўдару снарада?
Чаму я забываюся.
Як прамарудзіў пайсці аднойчы
На голас слёзнай самоты,
Што з цемры
чакаў чыёйсь вернасці
Чаму я ўсё помню,
Як не раз аж трымцеў,
Задаволены,
Калі мне казалі няпраўду
Пра маю непагрэшнасць?..
1984