Былінныя штурмы, паходы,—
Як полымя ў ззянні вякоў.
Запомнім, сябры, назаўсёды
Вялікія справы бацькоў.
Каб сёння і заўтра раслі мы,
Вітаючы поспех дзянны,
Бацькі
Ад любімай Радзімы
Адбілі навалу вайны.
Усё: і пакуты, і страты,
І грозныя дні ў барацьбе
Пазналі героі-салдаты
За нас —
За мяне і цябе.
Навек яны буры скарылі
І волі ўзнялі галасы.
І нам
Сваёй славай
Стварылі
Краіну шчаслівай красы.
Любыя вышыні ёсць крылам.
Ёсць праца любая рукам.
Надзейнаю,
мужнаю сілай
Мы устанем
на змену бацькам.
Ці ў токары, ці ў касманаўты,
Ці ў творцы
Пашлюць нас гады —
У заўтра, вялікае заўтра
Наш позірк заўжды і заўжды.
Усюды ў жыцці з перамогай
Мы пройдзем, сям’я дружбакоў,
Бо лепшая ў свеце дарога
Прад намі —
Дарога бацькоў.
1964