Дружа,
Не выключай тэлефон,—
Мне часам трэба з табой параіцца.
Асабліва
калі ў душы
агонь самалюбнасці разгараецца.
Калі на свет
з самаробнага п’едэстала,
што таксама здараецца,
Глядзіш, аддаўшыся ў пыхі палон...
Дружа, не выключай тэлефон...
Дружа,
Будзь гатоў мне цёплае слова сказаць...
Асабліва
калі ў душы
Пачынае патухаць полымнасць непаўторная...
Штось такое сонечнае і зорнае...
А халоднасць пакорная —
Адчуваеш — ідзе твае крылы звязаць...
Дружа,
будзь гатоў мне цёплае слова сказаць!..
1978