Карагодам звонка песня ходзіць,
Заглядае ў цэхі, будзіць хаты:
— Як у нас на трактарным заводзе
Самыя прыгожыя дзяўчаты!
— А чаму? А хто сказаў пра гэта?
— А таму,—
усім гаворыць песня,—
Што душа дзявочая сагрэта
Шчырай думкай, яснай марай весняй.
Марай той, што вырасла ў народзе —
Каб палі красой былі багаты.
Вось чаму на трактарным заводзе
Самыя прыгожыя дзяўчаты!..
Карагодам звонка песня ходзіць,
Скверы адгукаюцца, сады ёй:
— Як у нас на трактарным заводзе
Усе ў славе хлопцы маладыя.
Трактар зробяць — жыта шчасна родзіць,
Слова скажуць — іскры йдуць жывыя.
Вось чаму на трактарным заводзе
Усе ў славе хлопцы маладыя!..
Карагодам звонка песня ходзіць,
Бубнам б'е, звініць ля новых весніц:
— Як у нас на трактарным заводзе
Самыя найрадасныя песні!
А таму ў нас добрых песень многа,
Што ў нас кожны дзень багаццем поўны:
Што ні дзень — у працы перамога,
Слаўнага юнацтва ўзлёт цудоўны,
Што ні дзень — сустрэчы, наваселлі,
Што ні дзень — сяброўства гадавіны,
Добрыя, багатыя вяселлі,
Светлыя, шчаслівыя радзіны!
1951