Усё вы, ўсё пазналі і адчулі...
За ўсё даўно гатовы свой трымаць адказ...
Ну што ж, калі над вамі не свісталі кулі...
Затое
неслі ношу
часам і за нас...
Гляджу і веру:
вы і на высокі,
на Гастэлы ўзлёт гатовы...
Адно прашу вас:
зразумейце —
што гэта за міг...—
Што, ідучы на смерць, не йграюць словам...
Не выпінаюць грудзі між другіх...
Ні ў сціпласць не гуляюць, ні ў вялікасць.
Ні радасць не вяшчаюць, ні тугу...
А так:
Магу, дык і зраблю...
Усё зраблю, як родны свет паклікаў...
І нават і тады зраблю,
калі і не магу!..
1978