І рана ўстаць мы ўмеем самі,
І знаем сцежкі нацянькі
У светлы лес, дзе між дубамі
Чакаюць нас баравікі.
З вясёлым спевам, звонкім смехам
Мы ўсе абудзім гушчары.
Калі ж заблудзімся, дык рэха
Заўсёды скажа, дзе сябры.
Дзень добры вам, лясы-дубровы,
І гулкі бор, і хмызнячок.
Паклон табе, рудагаловы
Крамяны друг — баравічок!
Вітанне вам, з травы і кветак
Палян жывыя дываны.
Жыві і слаўся, шчасце лета,
На ўлонні роднай стараны!
1957