Ну-ка, ляціце вы,
Пчолкі, ў палёт,
Поле наведайце,
Луг, агарод,
Кветкі лясныя
І краскі балот,—
Самы салодкі
Збярыце там мёд!
Ну-ка, ляціце вы,
Пчолкі, хутчэй,
Трэба мядок нам
Для нашых дзяцей,
Трэба мядок
Для радзін, для гасцей,
Каб у нас людзі
Бывалі часцей.
Трэба мядок
І для самых старых,
А яшчэ болей —
Для ўсіх маладых
(Сын мой, скажу я вам,
Зараз жаніх),
Трэба мядок
На вяселлі для іх.
Трэба мядок
Для ўсіх сэрцаў, што тут
Так упрыгожылі
Бацькаўскі кут,
Глянеш на поле —
Не поле, а цуд:
Нават адвечны
Ажыў у нас груд!
Ну-ка, ляціце вы,
Пчолкі, ў палёт,
Хай напаўняюцца
Скрыначкі сот,
Хай напаўняюцца
Скрыначкі сот,
Каб гаварылі
Вяскоўцы ўвесь год:
— Ах жа і пчолы!
— Ах, пчалавод!
Дзякуй вам шчыра
За гэтакі мёд!..
1956