Маладому герою,
Юнаку, што пазнаў перамогі сакрэт,
Уручае партыя сёння
Партыйны білет.
Людна ў залі райкома...
Урачыстая ціша...
І час настае —
З цёплым словам сяброўскім,
З прамовай напутнай
Сакратар,
Баявы камісар,
Устае.
...Мы ўручаем давер’е народа табе,
Што здабывалася ў працы і ў цяжкіх баях,
Права
Першым заўсёды ісці ў барацьбе,
Першым несці наперад
Камунізма сцяг.
Уручаем табе мы
Сонца нашых кастрычніцкіх заваёў,
І натхненне народа,
І мужнасць народа,
І той шлях, што Радзіму да шчасця прывёў.—
І руку паціскае,
Як бацька і сябра,
Стары бальшавік юнаку.
А таму —
А таму свет па-новаму бачыцца,
Як ніколі яшчэ на юнацкім вяку.
Быццам дужыя крылы
Падымаюць яго ў неабсяжны сусвет.
І, як сонца, яснее,
І, як сцяг, палымнее
У руках яго
Родны
Партыйны білет.
1948