Памяці ўкраінскага паэта Яраслава Шпорты
О як я хацеў бы, каб песня ўдалася!
Сябры мае добрыя,
Лірнікі мудрыя,
Героі, нашчадкі Шаўчэнкі Тараса,
І вы, што папалі пад сны непрабудныя,
І вы, што ўзвіхрылі
касмічныя трасы,
О як жа хачу я,
каб песня ўдалася,
Іначай, здаецца, шчаслівы не буду я!
Жыццё — не адна толькі роўная роўнядзь,
Бясхмарная далеч з зарой прамяністаю;
Жыццё — не заўсёды спагадамі поўніць,
А часта
страчае дарогай цярністаю;
І часта бывае —
і з сэрцам гартоўным
Нялёгка, няпроста да мэты чароўнай
Дайсці —
супроць бураў і роспачы выстаяць.
Жыццё выпрабоўвае гневам і болем,
І сумам цяжкім, і жалобаю стратнаю.
І шчасце —
калі пад нягодай любою
Ты чуеш падтрымку сардэчную, братнюю,
І шчасце —
калі праз навалы з табою,
Ажно да апошняга грознага бою,
Друг верны ідзе
з непахіснасцю ратнаю.
Сягоння згадаю франты і паходы,
Змагання і бітваў шляхі незваротныя,
І бачу,
І свету кажу назаўсёды:
Былі са мной побач,
адданыя, родныя,
Героі, сыны ўсіх савецкіх народаў,
І вы сярод іх —
вы, крылатага роду
Нашчадкі Тараса,
арлы быстралётныя!
Адзін з вас,
юнак, летуценны і ўзнёслы,
Ды з мужнай душой,
ды з адвагай быліннаю,
Хоць колькі мінула і зімаў і вёснаў,
Жыве ў маім сэрцы;
Самой Украінаю,
Самой вашай славай,— вячыста-зайздроснай,
Жыве яго вобраз —
і дружбай дзівоснай,
Што мне ён дарыў,
даражыць не пакіну я.
Ён думаў пра Кіеў, Дняпро і Карпаты,
Ён марыў ім спець
сваю песню найзвонкую,
А ў бітвах з чужынцам
крывёю салдата
Зрадніўся з маёй беларускай старонкаю.
І помняць яго, як зычлівага брата,
Шляхі Магілёўшчыны,
Міншчыны хаты
І ў Панямонні кражы нашы гонкія.
Гады праляцяць чарадою няспыннай,
У строй змагароў прыйдуць шэрагі новыя,
І зменіцца ява,—
ды вечна Айчына
Жыццём шанаваць будзе кожнага сына,
Што сэрца аддаў ёй часінай суроваю.
І вечна паклон і табе,
Украіна,
Слаць будуць народы
сардэчнаю моваю.
Няхай жа на крылах вялікага часу.
Сябры мае добрыя,
Лірнікі мудрыя,
Героі, нашчадкі Шаўчэнкі Тараса,
Ляціць і маё да вас слова;
Нязгаснай
Няхай будзе зорка той любасці яснай,
Што лучыць людзей,—
і шчаслівы век буду я!
1975