Не падводзьце, не падводзьце, хлопцы, рысы.
Не заводзьце
ў цень памінак
юбілей.
Не крышыце, не крышыце здобу ў місы.
Беражыце, зберажыце свой алей.
Не курыце, не курыце фіміяму.
Не свяціце юбілейнае вады.
Лепш скажыце,
што яшчэ, маўляў, ён самы
Самы-самы недавука малады.
Лепш пашліце, лепш пашліце давучацца..
І калі сябры спытаюць «дзе ж ён, дзе?»,
Адкажыце:
не такая ўжо ён цаца,
Каб нам ведаць,
дзе ён едзе ці ідзе...
Адкажыце:
можа, блізка, мо далёка...
На зямлі ці каля зор спяшае жыць...
Ён, такі-сякі,
ад выраку і ўроку,
Ён, такі-сякі,
ад немачы
бяжыць...
1978