Патрабуюць тэарэтыкі,
Знаўцы нашага палка,
Пашырэння геаграфіі
Паэтычнага радка.
Патрабуюць, пераконваюць,
Заклінаюць аж да слёз...
Ну і што ж,—
перакананыя
Выпрабоўваем свой лёс...
І ляцім у даль з ахвотаю
У імклівых ІЛ і ТУ;
То на поўдні, то на поўначы —
Ловім словы на ляту.
І гучаць у вершах розныя
Адрасы і тут і там...
Геаграфія — бязмежная,
Тэарэтыкам — бальзам...
Стракацяць імёны, станцыі,
Назваў тых — да забыцця...
Толькі часам а ці згадваем
Пра бязмежнасць пачуцця?..
Пачуцця, навек адзінага,
Ці то ў Мінску, ці ў Маскве,—
Непаўторная паэзія
Толькі ім заўжды жыве;
Пачуцця, якое месціцца
Не за дальняй каляёй,
Не на Марсе, не на Месяцы,
А ў душы тваёй адной...
1981