Капітаны, капітаны
З рачулачак сініх,
На якія акіяны
Вас жыццё закіне?
Дзе вам выпадзе пранесці
Флаг,
Высока ўзняты?
Чым вас буры стрэнуць
Дзесьці
Далёка ад хаты?
Капітаны, час настане
Для адвагі хвацкай.
Дык прыміце ж на расстанне
Вы наказ дружбацкі.
Пад любой зарой паходнай,
У любой краіне
Не забудзьце, хлопцы, родных
Рачулачак сініх.
Не забудзьце той прывабнай,
Той ласкавай хвалі,
На якой вы свой караблік
Першы раз пускалі.
І заўжды нясіце строга,
Каб не згасла сіла,
Тое слова, што ў дарогу
Маці падарыла,—
Слова ласкі да Айчыны,
Слова мовы любай,
Слова бацькаўскай сцяжыны
Слова славы трубнай.
Адплывае флот вясновы,
Доўга плыць ён будзе...
І ў адказ я чую словы:
— Помнім,
Не забудзем!..
1964