Дзе б я ні прамовіў
Савецкае слова —
Ніхто мне не кіне пагарды суровай,
Ніхто не ўсміхнецца
з двурушным фасонам,
Ніхто не адкажа
ў мой адрас праклёнам,
Ніхто — ні старыя, ні ўнукі іх — дзеці
Мяне не збаяцца
на цэлым на свеце!
А дзе б ні сказаў я
Савецкае слова —
Адразу ўсе бачаць
свет сонечны, новы,
Адразу ўяўляецца ўсім,
як ракеты
Ляцяць ад зямлі на другія планеты,
Адразу ўсе чуюць
не кліч кананіра,
А голас магутнага, мудрага міру.
І вусны мільёнаў —
ад Ганга да Влтавы —
Пры стрэчы са мною
жадаюць мне славы,
І рукі мільёнаў —
ад Конга да Віслы —
Жадаюць руку маю шчыра паціснуць.
І нават і той, хто ад нашага слова
Шалёнаю злосцю
Застогне нанова,
Чаго б ні жадаў ён
Савецкай Радзіме,
Усё ж капялюш
Прада мною
свой зніме!..
1961