Што стала з намі?..
Спраўджана,
што снілі:
Як самацвет
са сталі і цаглін,
Устаў наш дом;
І цёпла гаманілі
Над ім вяршыні соснаў і ялін.
Што стала з намі?..
Звонкім наваселлем
Уславілі святло сваіх акон:
Пра сонца,
пра вясну з гасцямі пелі,
Пра вернасць —
пра святое шчасце дзён.
Што стала з намі?..
Йшчэ хаваюць сосны
Паміж галін
тых песень перабор...
А нам чамусь
дваім застацца млосна,
І хто куды
нясем самоту ў бор.
Што стала з намі?..
Ад пяшчот наўцёкі
Бяжым, бяжым —
усё далей, далей.
І бачыцца ў смузе наш дом высокі —
Нібыта нашай мары маўзалей.
Што ж стала з намі?..
Скуль прыйшоў ён, вырак,
Што сэрцы раздзяліў сцяной мяжы?
І покуль вырак той у смерць не вырас,
Як зразумець,—
хоць слова мне скажы,—
Што стала з намі?
1975