Ты ці не ты там стаіш арабінай —
З хусткай барвістаю,— ты ці не ты,
Ціха апаўшы тугой вераснёвай
На бераг круты?
Ты ці не ты неаджытым праменем
З днём развіталася — ты ці не ты,
Кінуўшы ўсім чарацінам на плёсе
Своіі бляск залаты?
Ты ці не ты пралягла над зямлёю
Зорнай дарогаю — ты ці не ты,
Ззяючы роздумам, ззяючы ўцехай
Для кожнай вярсты?
Ты ці не ты...— адкажы, адгукніся.
Дзе ты? — ці ў радасці ты, ці ў журбе?..
І для чаго і нашто столькі часу
Хочаш, каб сэрца шукала цябе...
1958