Плячысты дуб,
І рослы клён,
І стройная сасна
Шумяць-пяюць,
Што зноў прыйшла
Да нас
Вясна-красна.
Шумяць-пяюць:
— Вясна-красна,
Ты — сонца, ты — жыццё,
Паклон табе
За ясны дзень,
За новае лісцё!
— Паклон, паклон
Вясне-красне! —
Пяюць на ўсе лады
Жыты на полі,
І рака,
І пожні, і сады.
І спеў іх
Слухае вясна —
Зямлі адданы друг —
І, шчодрая,
Нясе красу
Усім, усім наўкруг:
Сядзібам — квецень,
Рэкам — сінь,
Палям — зялёны ўбор.
А нам,
А сэрцам маладым —
Шляхі ў бязмеж-прастор.
Куды ні пойдзем —
Знойдзем мы
Жыцця цудоўны скарб:
Для песень — музыку,
Для спраў —
Святло
Вялікіх мар,
Для дружбы —
Шчырасць і цяпло,
І радасць не адну...
Ідзём жа
Песняй сустракаць
І мы
Вясну-красну.
— Вясна-красна,
Вясна-красна,
Паклон табе, прывет!
Прыйшла ты ў наш
Любімы край,
Хай нам
Зайздросціць свет!
1954