Мой тата —
Слынны камбайнёр,
Яго ў нас кожны знае.
У таты — Зорка на грудзях
Агніста,
Ярка
Ззяе.
Умее тата
Ўсё ў жыцці,
І я ім ганаруся.
І я гарнуся да яго,
І з ім я
Жыць вучуся.
Вучуся ў таты —
Рана ўстаць
На працу
Разам з сонцам.
Вучуся
Ўсіх людзей вітаць,
Быць іхнім
Абаронцам.
Як тата мой,
Хачу я быць
Сумленным,
Добрым,
Чыстым.
Як з нівы зернятка —
Любіць
Свет цэлы
Прамяністы.
І будзе ў мяне
Ўсякіх спраў —
Я ведаю —
Багата.
І веру:
Ўсе іх параблю,
Як дарагі мой
Тата!..
1985