— З кім ты ў садзік
Ходзіш, Вацік?
— А са мной
Мой
Меншы брацік.
— А што робіце
Вы ў садзе?
— А мы з ім
Будоўлю ладзім...
Я з цаглінак
Дом збіраю.
А Ясь
Працу правярае.
Сам ён
Хоча ставіць дом,
Хоча быць
Будаўніком,
Ды не можа
Дом сабраць,—
Можа
Толькі правяраць...
Правярае ён
рупліва,
Карпатліва і зычліва,
Каб нічога
Не ўпусціць:
Усё прэч,
Набок ляціць...
Ляцяць з грукам
Вокны, дзверы,
Столь, падлога з шуляком,
Тынк ды клямка з касяком...
Калі ўсё ён
Мне праверыць,—
Трэба нанаў
Ставіць дом...
1985