БЕЛАРУСКАЯ ПАЛІЧКА

Кастусь Кірэенка

Заступіце на вахту, паэты

 

 

Заступіце на вахту, паэты,

Ды хутчэй! — з гулам высіцца вал...

Капітан ваш упаў перад светам

На пасту,—

яшчэ цёплы штурвал.

Капітан ваш упаў сярод ночы,—

Сцішваў крык — не застрашыць каб вас.

Але вочы,—

глядзяць яшчэ вочы

І трывожны даюць вам наказ.

Яшчэ

сэрцам

не ўсюды

сагрэты

У цунамі жыцця акіян...

Заступіце на вахту, паэты,

Ды хутчэй! —

наказаў капітан...

 

1978

1978

---

Тэкст падаецца паводле выдання: Кірэенка К. Збор твораў: У 3-х т. Т. 2. Вершы, паэмы 1962 - 1981 гг. - Мн.: Маст. літ., 1987. - 495 с.
Крыніца: скан