Жаваранак, жаваранак,
Птушачка-іскрыначка,
Галасок — як срэбра звон,
Як прамень — пярыначка.
Жаваранак, жаваранак,
Наша радасць весняя,
Падымі ты нас, гукні
Срэбна-звонкай песняю.
Падымі нас, правядзі
Па зямлі разбуджанай —
Дзе праталіны ў палях,
Дзе на лузе — лужыны,
Дзе на рэках ледаход
Весела ўздымаецца,—
Дзе вясновае пары
Ўцеха пачынаецца!
Жаваранак, жаваранак,
Птушачка чароўная...
Не сціхай, звіні, звіні,
Песня, ласкі поўная!
1954