epub
 
Падключыць
слоўнікі

Людміла Рублеўская

Партрэт бабулі

Прабачце, паненка, у строях шляхетных, цнатлівых,

З бялюткім праборам у гладкіх, як лён, валасах.

Былі вы з гасцямі прыветнай, прыстойна-маўклівай.

І думка адна пра каханне навейвала страх.

А мне ўжо нічога ад вас не пакінулі воды,

Імклівыя воды старой радаводнай ракі.

Спадніцы крухмальныя сталі пялюшкамі потым,

Каўнер-самавяз памяняны на лыжку мукі.

І рукі, што ўмелі задумліва клавішы лашчыць,

І крыжыкам шыць, і лацінскія кніжкі гартаць,

Пасля навучыліся працы штодзённай, бяднячай,

І ўнукам нічога амаль не змаглі перадаць.

І я ці змагу на калені ў царкве апусціцца

Так проста і шчыра, ці маўзеру ў вока зірнуць

І, нат не збялеўшы, чужынцу шпурнуць завушніцы

І шлюбны пярсцёнак - а годнасці - не забяруць.

Прабачце, паненка у строгім шляхецкім убранні.

Я ведаю - вы не такой уяўлялі мяне.

Ды нейкую сувязь пакінула неба між намі,

Таму і вісіць ваш партрэт у мяне на сцяне,

Таму і складаюцца гэткія дзіўныя вершы,

Таму непамысна мне ў тлумных сучасных сяброў,

І дом мой заўсёды - як ціхая кутняя вежа,

І мову - адну выбіраю між роднасных моў.

 




Беларуская Палічка: http://knihi.com