У чалавечых тлумах
Чуюся аднаверцам:
Сэрцу хочацца думаць,
Думаць хочацца сэрцам.
Згукі лаўлю і зрухі
Чуйна, як на паверцы:
Сэрцу хочацца слухаць,
Слухаць хочацца сэрцам.
Золак людской удачы
Поўніць вачэй азерцы:
Сэрцу хочацца бачыць,
Бачыць хочацца сэрцам.
Сцежка ідзе, не збочыць,
Шляхам у век прарвецца:
Сэрца ўражае вочы,
Вочы глядзяць у сэрца.
Хтосьці пашэпча ціха —
Рэха мне адгукнецца:
Сэрца кранецца слыху,
Слых пазвініць у сэрца.
Жыць не па звыклай мерцы,
Лёсам шукаць ратунку:
Думка бунтуе сэрца,
Сэрца раджае думку.
1972