epub
 
Падключыць
слоўнікі

Марыя Канапніцкая

Доля наша

З польскай — М. Канапніцкай

 

Пад якой ідзеш зарою,

Ой, ты, доля наша —

Ці пад хмарнай, пад бурлівай,

Што віхрамі страша,

 

Што над сумнаю зямелькай

Ходзіць, ды не свеціць,

І сумліва пазірае,

І крывёй свет квеціць?

 

Ці ідзеш ты, наша доля,

Пад той зоркай яснай,

Што варожыць нам дзянёчак

Сонечны і шчасны,

 

Што ў красу загон аздобіць,

Ў суме засяваны,

Пазалоціць хатаў чорных

Стрэхі саламяны?

 

Ці ідзеш ты, наша доля,

Пад той зоркай яснай,

Што варожыць нам дзянёчак

Сонечны і шчасны?

[1919]



Пераклад: Янка Купала

Беларуская Палічка: http://knihi.com