epub
 
падключыць
слоўнікі

Мікола Маляўка

Не спяваюць вячоркі

Песня родная наша,

Я знайшоў цябе ў кнізе.

І прашу-заклінаю:

На вячоркі вярніся!

 

Ты прыходзіла з прасніцай.

Вераценца люляла -

І ўсміхалася, ясная,

І тужыла, бывала.

 

Ты сядзела за кроснамі,

З успамінамі спетая,

Вечарамі марознымі

Адлучалася ў лета.

 

Ты палотны адбельвала,

Каб глядзеліся казкай,

Упрыгожвала беднасць

Ручнікамі ды ласкай.

 

Ад маўчання сасмаглая,

Не тулілася збоку,

А хусцінкай узмахвала

І пускалася ў скокі.

 

Дык чаму ж ты, жывая,

Заняпала пакрыху,

Як нямая, хаваешся

У фальклорную кнігу.

 

Ціха падаюць-плачуць

Над радзімаю зоркі -

Не працуюць, не скачуць,

Не спяваюць вячоркі.

 


2007

Тэкст падаецца паводле выдання: невядомае
Крыніца: невядомая