epub
 
падключыць
слоўнікі

Пімен Панчанка

"Асеннімі дажджамі заліло..."

* * *

Асеннімі дажджамі заліло

Апошнія чаканні і спатканні,

Пажоўклых клёнаў ціхае святло,

Скупога сонца роснае дыханне.

 

І пачала зямля крыху цвярдзець,

То сцюжа — пераможца ў паядынку

Раскідвае зары світальнай медзь

У лужынах барвовыя ільдзінкі.

 

А потым навалілася на дол

Вялікая і белая бясконцасць.

І заблудзіўся кожны мінскі дом

У пошуках растрачанага сонца.

 

А твар зямлі заснежанай не мёртвы:

Ён зменлівы, як пошум баравы.

Там, у барах, аж да вясны ў сумётах

Схавалі свае трубы журавы.

 

Яны іх знойдуць і яшчэ зайграюць,

Склікаючы дзяцей, ліству, блакіт.

І па ўсім краі аж да небакраю

Маланкамі набухнуць аблакі.

1971


1971

Тэкст падаецца паводле выдання: Панчанка П. Збор твораў: У 4-х т. Т. 3. Вершы 1963-1981 гг. - Мн.: Маст. літ., 1982. - 351 с.
Крыніца: скан