epub
 
падключыць
слоўнікі

Пімен Панчанка

Беларускай чыгунцы

Чыгунка Беларуская,

Трывожныя гудкі...

Твае тугія шпалы —

Пявучыя радкі.

У кожнага ці станцыя,

Ці хоць паўстанак ёсць,

Дзе пачалася, скончылася

Наша маладосць.

Мы не былі абражаны

Вакзальнай духатой

І цеснатой вагоннаю...

Абы не пехатой.

На станцыях ты шчодра нас

Паіла кіпятком

І частавала вішнямі,

А зрэдку і мядком...

Даруй, цябе ірвалі мы

І трушчылі на друз,

Калі да нас вазіла ты

Чужы смяротны груз.

Не па сваёй ахвоце,

Не па сваёй віне.

І ўсе пераканаліся,

Што гнеў жалеза гне...

А потым быў твой лепшы дзень,

Высокі зорны час,

Калі скрозь кветкі, слёзы, плач

З вайны ты везла нас.

Легендаю зрабіліся

Дні «рэйкавай вайны»,

На стыках зноў ты цокаеш

Абцасікам стальным.

Цяпер ты ўся інакшая,

Інакшы груз вязеш...

Ды часам, чарку выпіўшы,

«Зямлянку» зноў пяеш.

І ўсё адразу робіцца

Сардэчней і прасцей.

І для народа сцелеш ты

Вандроўную пасцель.

1974


1974

Тэкст падаецца паводле выдання: Панчанка П. Збор твораў: У 4-х т. Т. 3. Вершы 1963-1981 гг. - Мн.: Маст. літ., 1982. - 351 с.
Крыніца: скан