Цябе вітаем мы па-брацку:
Расці вышэй, ідзі далей!
І толькі племя гарлахвацкіх
Твой не адзначыць юбілей.
А ты і рад: іх біў нямала,
І будзеш біць нястомна, каб
На белым свеце меней стала
Махальнікаў, аслоў і жаб.
Віншуючы з пачэснай датай
Цябе і чытачоў тваіх,
Гатоў даць «Вожык» кандыдатаў
Для новых п’ес, для новых кніг.
Народ з тваім здружыўся смехам
І праўду палюбіў тваю
І сёння ў гонар твой над снегам —
Усюды жаўранкі пяюць.
1956