epub
 
Падключыць
слоўнікі

Пімен Панчанка

Крык сойкі

Рыжаватая, чарнапёрая,

А на крылах — блакіт для красы...

Кожным летам ад тлуму і зморы я

Уцякаю ў твае лясы.

 

Ды заўсёды такі насцярожаны

Крык твой, сойка.

Птушыны гнеў.

Можа, мне тут хадзіць няможна?

Не крану я ні гнёздаў, ні дрэў.

 

Ты ахоўвай, што ахоўваеш.

Хто спакою табе не дае?

І яловыя, і альховыя,

І дубовыя — ўсе твае.

 

Што ж ты крыкам мяне сустракаеш?

Мы маглі б падружыцца, бадай.

Ці то ворагаў многа маеш?

Ці то мне пагражае бяда?

1975


1975

Тэкст падаецца паводле выдання: Панчанка П. Збор твораў: У 4-х т. Т. 3. Вершы 1963-1981 гг. - Мн.: Маст. літ., 1982. - 351 с.
Крыніца: скан

Беларуская Палічка: http://knihi.com