epub
 
падключыць
слоўнікі

Пімен Панчанка

Нашым сынам

Не гаруйце, хлопцы,

Што нарадзіліся позна,

Што замест рамантыкі —

У вас нуда граматыкі.

Вы яшчэ на подзвігі

Атрымаеце позвы,

І па вас наплачуцца

Сёстры і маткі.

 

Не журыцеся, хлопцы,

Што нарадзіліся рана,

Вы нарадзіліся

У самы добры час:

Вы бачылі ўчора

На блакітных экранах

Першага пешахода

Завоблачных трас.

 

А я нарадзіўся

У вялікім Семнаццатым,

Гэты год запомніць

Трэба нам усім:

Рэвалюцыя —

Пачатак касманаўтыкі,

Нашай праўды,

Нашай славы,

Нашых сіл.

 

Не забудзьце, хлопцы,

Перад стартамі

Ўспомніць наша гора,

Нашы страты.

А заганы нашы,

Страхі і хваробы

Пакідайце

За зямным парогам.

1965


1965

Тэкст падаецца паводле выдання: Панчанка П. Збор твораў: У 4-х т. Т. 3. Вершы 1963-1981 гг. - Мн.: Маст. літ., 1982. - 351 с.
Крыніца: скан