Здыміце шапкі:
Вязуць нябожчыка.
Мажліва, грузчыка,
Мажліва, возчыка.
Вязуць не нейкага,
Вязуць сумленнага:
Сябры — як непагадзь,
Жонка — самлелая.
А за нябожчыкам —
Шыпенне шын,
Жалобным пошчакам
Гудкі машын.
На бруку слотным
Разгон гасі:
Не меней сотні
Таксі, таксі...
Прасілі людзі —
Ехаў праз ноч.
Таксісту ў грудзі
Ўсадзілі нож.
Таксісту выбілі
З вачніцаў сонца.
Бандыты выпілі
На тры чырвонцы...
А шофер, можа,
Калісь малых
Вёз асцярожна
З радзілкі іх.
Што ім, грамілам,
Наш добры век!
Памёр кармілец
І чалавек.
Няма запчастак
Для нас, мой друг...
Лісток зубчасты
Ляціць на брук.
1965