Карыбскія піраты
Уцяклі ў Панамскі порт.
Японскі імператар
Вітаў сусветны спорт.
І ныюць усязнайкі
У горадзе маім:
Ад Явы да Ямайкі
Усё вядома ім.
Лімоны і бананы —
Занадта ўжо банальна,
І кофтачкі з нейлону —
Для іх ужо шаблонна.
Прывыклі да маштабаў:
То форум, то кангрэс...
А ў нас цвітуць каштаны,
І вішні, і агрэст.
І ракатанне бору,
І сонца над ліствой,
І Нарачы прыбоі —
Якое хараство!
Пакуль там касманаўты
Рыхтуюць новы цуд,
Б’е на Палессі нафта,—
Ад радасці танцуй!
А гэтыя не бачаць:
На цуд ім напляваць,
Віхлява твісты скачуць
І джынсамі фарсяць...
Не вохайце, не ахайце.
Каго паэт уцяў?
Мы ўсе стаім на вахце
Вялікага жыцця.
Таварышы парторгі,
Бацькі і песняры,
Ці не зашмат без толку
Сядзім мы да зары?
Ці тыя кажам словы,
Ці ўсё знайшлі яны
У нас, каго сурова
Вучылі дні вайны?
1964