epub
 
падключыць
слоўнікі

Пімен Панчанка

"Учора сэрца сціснула мне жалем..."

* * *

Учора сэрца сціснула мне жалем,

Хоць звыкся з плачам і сірот, і ўдоў...

Між кветак душных у труне ляжала

Дзяўчынка васемнаццаці гадоў...

 

Бяры старых распусніц, цісні грудай,

Хапай бандзюг, бязносая карга.

А ты бярэш і маладых, і мудрых.

Ці, можа, пераблытана чарга?

 

Прырода, ты габлюеш слепа дошкі,

Абкрадваеш сябе ты і людзей.

Гагарын, Каралёў, Ландау, Твардоўскі

Былі на ўскрайку залатых падзей.

 

Прырода-маці, мы твая часцінка,

Ты нас да чалавечнасці ўзняла,

Расплаў ты абыякасці ільдзінкі,

Займей сумленне, што ты нам дала.

1976


1976

Тэкст падаецца паводле выдання: Панчанка П. Збор твораў: У 4-х т. Т. 3. Вершы 1963-1981 гг. - Мн.: Маст. літ., 1982. - 351 с.
Крыніца: скан