epub
 
падключыць
слоўнікі

Пімен Панчанка

"За акном — бясконцых шын шыпенне..."

* * *

За акном — бясконцых шын шыпенне.

Раптам, уварваўшыся ў пакой,

Скаланула музыка Шапэна

Мой шумлівы гарадскі спакой.

 

Я журботны плач паціху слухаў —

Чалавеку склалі дзве рукі.

Зрэдку барабан няўмольна бухаў,

Быццам забіваў ужо цвікі.

 

Род людскі пабольшаў і паменшаў,

Вечны рух на сцежках крыжавых...

А Шапэн аплаквае памершых,

А Шапэн жыве паміж жывых.

1977


1977

Тэкст падаецца паводле выдання: Панчанка П. Збор твораў: У 4-х т. Т. 3. Вершы 1963-1981 гг. - Мн.: Маст. літ., 1982. - 351 с.
Крыніца: скан