epub
 
Падключыць
слоўнікі

Робэрт Бёрнс

Заклік Бруса да шатландцаў

Вы, бясстрашныя мужчыны,

Што з Уолесам айчыну

Баранілі чын па чыну

І мяне віталі, -

 

Знайце! Меч брытанскай змовы

Ўзняты зноў, і мы гатовы

Бой прыняць, каб іх падковы

Край наш не тапталі.

 

Нашы сёлы, нашы нівы

Вораг люты і пыхлівы,

Вераломны Эдвард хцівы,

Заняволіць можа.

 

Час настаў! За агароджай

Мужна стрэнем стан варожы

І ў баі - ці пераможам,

Ці галовы зложым!

 

Той, хто з бітвы можа збегчы

І рабом на плаху легчы,

Хай пры печы грэе плечы

І не ганьбіць строю.

 

Хай жа стануць у страі

Тыя, што ў цяжкім баі

Будуць біцца за траіх

З мужнасцю герояў!

 

За спакой далін шатландскіх,

За жніво ў палях сялянскіх,

За пітво ў харомах панскіх

Дружнымі радамі

 

Бурным рушымся прыбоем

На захопнікаў і з боем

Абаронім ад разбою

Волю нашу самі!

 



Пераклад: Язэп Семяжон

Беларуская Палічка: http://knihi.com