Мэты, мары, крылы,
Воля, вышыня,
Ранак, поўны сілы,
Моц жыцця — штодня.
У бяскрай-прастору
Існасці прастор.
Шлях — у гору, ў гору,
Да аблок, да зор.
Не стрымаць нястрымны
Росквіт, не суняць —
О, каб неабдымны
Свет хутчэй абняць.
Свет — спрэс каляровы,
Дорыць дабрыню,
Ды запал ружовы
Саступае дню.
І ружовасць неба
Засціць смутку дым —
Бо другім не трэба
Твой духоўны ўздым.
І слабеюць сілы,
Вянуць пакрысе —
Дажывай бяскрылы,
Роўны — як усе.
Пахавай натхнёна
Ўсё, што ў сэрцы нёс...
Вечар, як заслона,
Месяц, як ікона,
Зоркі — кроплі слёз.
Час — як склеп магільны,
Лёс — як кнот смыліць.
Бог і той бяссільны
Боль душы крыліць.
Быццам страціў кроў я —
Ні душы вакол.
Вынік — бессэнсоўе,
Ноч, тупік і дол.