Адкрыццяў многіх прарастала семя
Імгненна, раптам, як дзівосны сон —
Ньютону яблык шмякнуўся на цемя,
І вось ён — гравітацыі закон.
І тое векапомнае імгненне —
Трыумф! Падзея! Эўрыка! Прарыў!..
А я закон уласны прыцягнення
Не для сусвету, для душы адкрыў.
Я шмат дзе быў, ды там не мог прыжыцца,
Дамоў спяшаўся з-за мяжы, здаля.
Мой родны кут не адпускае, сніцца,
Бацькоўская прыцягвае зямля.
Для сэрца больш галоўнага закона
Няма, чым прыцягненне ў родны край.
Няхай сабе пазней, пасля Ньютона,
Яго адкрыў я для сябе, няхай.