Што гэта, за жыцця прыярытэт?
Што трэба для таго, каб жыць у шчасці?
Мне доўга і па-свойму раскрываў жыцця сакрэт
Адзін аматар за каўнер закласці.
«Наш свет ажно кішыць ад дзівакоў,
I ўсе даюць сваім дзівацтвам волю —
Вунь, бабы аж шалеюць без тартоў... і мужыкоў,
А я дык не магу без алкаголю.
Ці ўзяць, напрыклад, спевака таго ж,
Ён згодзен сам у мікрафон залезці,
Каб даць канцэрт — у Афрыку загоніць пешшу вош,
А мне б кульнуць — я згодзен і не есці.
А вунь вучоны — што з ім гаварыць?
Ён будзе век над мікраскопам кіснуць,
Каб свет здзівіць пустым — хоць інфузорыю адкрыць,
Яму — сваё. А мне — хутчэй хлабыснуць.
Сказаць па-праўдзе, піць пачаў даўно,
І стаж мой надалей мяне натхняе.
Хто любіць вернісажы, хто тэатры, хто кіно,
А мне ўсё гэта пляшка замяняе.
А ўзяць цябе — і ён пачухаў плеш,
Парнуў мне ў грудзі, высмаркаўся зычна
Малюеш, штосьці пішаш і не п’еш. Ці ж ты жывеш?
А я вось п’ю. Нябожчык — не. Лагічна?»